You are here > News > Monday News

Last Updated:16.08.2010

ENGLISH | SWAHILI | SPORTS

 

Simba yahama Zenji, Echesa amvuruga Phiri

KIUNGO tegemeo wa Simba Mkenya, Hillary Echessa ameumia mazoezini kwenye Uwanja wa ngome mjini Zanzibar, lakini timu hiyo inahama kambi kuepuka fitna za Yanga.

Echessa akicheza kwenye nafasi ya kiungo na Mohammed Banka msimu uliopita waliifanya Simba tishio na haikupoteza mchezo hata mmoja zaidi ya kutoa sare mbili rekodi ambayo Kocha Patrick Phiri anajivunia na kuiboresha zaidi msimu huu lakini mambo yameharibika.

Phiri aliiambia Mwanaspoti jana Ijumaa mchana kwenye kambi ya Simba mjini Zanzibar kuwa watashinda mechi ya Jumatano dhidi ya Yanga, lakini Echessa ameumia na atakuwa nje kwa kipindi kisichopungua miezi miwili na itawagharimu.

"Echessa amefanyiwa uchunguzi kwa mionzi leo(jana Ijumaa) imebainika kuwa amejitonesha lile goti lililokuwa linamsumbua na itabidi akae nje ya Uwanja kwa kipindi ambacho hakitapungua miezi miwili,"alisema Phiri akionekana asiye na furaha.

"Kuumia kwake ni pengo kubwa kwavile ni tegemeo katika mfumo wangu haswa wakati kama huu ambao tuna mechi ngumu ya watani wa jadi na ligi iko karibu kuanza.

"Wapo wachezaji kama Nico Nyagawa na Patrick Ochan ambao wanaweza kuziba nafasi yake lakini kumkosa mchezaji muhimu kama Echessa ni tatizo kubwa haswa ukizingatia kwamba kipa namba moja Juma Kaseja tayari ni majeruhi na atakuwa nje ya Uwanja kwa muda.

"Namuamini sana kipa wangu Ally Mustapha na nimemwambia huu ndio wakati wa kuonyesha uwezo wake na kuvaa vilivyo viatu vya Kaseja, ni kipa mzuri ndio maana nilimsajili kwa mara nyingine. Lakini ukweli upo wazi Kaseja ni kipa bora wa nchi hii kutokana na rekodi aliyoweka msimu uliopita kwa kutopoteza mchezo hata mmoja."

"Lakini kambini morali ya wachezaji hususani hawa wapya ipo juu, kila mmoja anaonyesha juhudi sana, "alisema Phiri na kusisitiza kikosi chake kipo tayari kwa mchezo wa ngao ya hisani Jumatano dhidi ya Yanga na wachezaji wake wamemthibitishia kwamba asiwe na wasiwasi.

Habari toka ndani ya uongozi zinasema kuwa mikakati ilikuwa inaendelea ili kuhakikishia baada ya mazoezi ya jana Ijumaa jioni timu inahama kwenye hosteli za "Kwa Zakaria" eneo la Mbweni na kuhamia sehemu nyingine hukohuko Visiwani na hata Uwanja wa Fuoni watauhama kuanzia leo Jumamosi.

Simba imeona sura zisizo za kawaida Uwanjani na maeneo ya Mbweni na kupata wasiwasi wa hujuma. "Kuhama kambi ni jambo la kawaida inapofika kwenye mechi ya Simba na Yanga, mi sishangai," alisema Phiri huenda akamchezesha Nyagawa badala ya Echessa.

 

Poulsen:Fitna za Simba, Yanga hazisumbui

FITINA za Simba na Yanga sio kitu kigeni kwa Kocha mpya wa Taifa Stars, Jan Borge Poulsen, ambaye amebainisha yuko ngangari kufanya kazi katika mazingira hayo.

Poulsen, ambaye alitua nchini Jumapili iliyopita, aliiambia Mwanaspoti fitina na mizengwe ni sehemu ya siasa za soka na anaelewa upinzania wa jadi wa Simba na Yanga zinazopambana Jumatano ijayo.

"Unajua haya ni mambo ya kawaida kabisa kwenye soka yako kila mahali yapo iwe Fifa, klabu kubwa za Ulaya kama Barcelona na Real Madrid utasikia nako kuna migogoro," aliongeza Poulsen akiwa na maana ya fitna za uchaguzi wa mwaka huu wa Barcelona uliomweka madarakani Sandro Rosell. Pia kujiuzulu mwaka jana kwa aliyekuwa Rais wa Real, Ramon Calderon baada ya kutuhumiwa kuiba kura kwenye uchaguzi wa mwaka 2006. Poulsen amesema alisoma kwenye intaneti juu ya mgogoro wa Yanga kufuatia vurugu zilizozuka kwenye uchaguzi wake hivi karibuni. Pia alisema kwa klabu zinazoundwa kwa mfumo wa wanachama ni kitu cha kawaida kuwepo kwa misuguano. Amesema kwa kuwa Simba na Yanga hazijaingia katika mfumo wa kulipwa kwa asilimia 100 ndio maana kunakuwepo mivutano ya hapa na pale. Poulsen amesema akiangalia kwa masuala ya uwanjani, soka ya Yanga imemvutia na kudai sasa anataka kuiona Simba ambayo imejichimbia Zanzibar wakati itakapokabiliana na wapinzani wao wa jadi.

Make Comments About this Article click here