You are here > News > Saturday News

Last Updated: 21.8.2010

ENGLISH | SWAHILI | SPORTS

Uingereza kuendelea kuwa mshirika wa Tanzania -Balozi

UINGEREZA imesema itaendelea kuwa mshirika wa Tanzania katika maendeleo kwa kuwa mazingira yake kisiasa yanavutia uwekezaji.Balozi wa Uingereza nchini, Diane Corner alisema hayo jana jijini Dar es Salaam.Alisema ikilinganishwa na nchi nyingine za Afrika Mashariki, Tanzania ni tulivu, ina rasilimali za kutosha na inavutia kwa uwekezaji.

"Tanzania ni nchi tulivu na mazingira yake yanavutia uwekezaji. Uingereza imeamua kuiweka (Tanzania) katika ramani yake ya uwekezaji," alisema Balozi Corner na kubainisha kuwa mwaka jana, Waingereza 55,000 walitembelea Tanzania kwa ziara za kitalii.

Alisema mbali na utalii huo, takriban Waingereza 7,000 wanaishi nchini kwa shughuli mbalimbali.

Balozi Corner alisifia vyombo vya habari nchini, akisema vimenatoa mchango mkubwa katika kukuza demokrasia.

"Nisingependa kuzungumzia chombo kimoja bali mtazamo wangu kuhusu vyombo vya habari. Kwa kweli vimechangia sana hali hii ya kuwa na demokrasia ya kuridhisha," alisema.

Alisema vyombo vya habari vya Tanzania vimekuwa huru kuliko ilivyokuwa miaka ya tisini na kwamba, sasa watu wanapata habari zaidi.

Awali mkurugenzi wa Mwananchi Communications, Sam Shollei alieleza kuwa anaamini mabadiliko katika siasa za Tanzania, yanaweza kutokea katika chaguzi zijazo kutokana na mabadiliko mbalimbali.

"Nimeanza kuona wimbi la vijana likijiingiza kwenye siasa na wazee wakianguka. Hii inaashiria kuwa kutakuwa na mabadiliko makubwa baada ya Rais Kikwete," alisema Shollei.

Kabla ya kukutana na Shollei na baadaye wahariri wa magazeti yanayochapishwa kampuni hiyo, Balozi Corner alitembelea vitengo mbalimbali, ikiwemo kiwanda cha uchapishaji, ambako alivutiwa na mtambo wa kisasa wa kuchapisha magazeti unaomilikiwa na MCL

Rushwa ilikithiri kura za maoni CCM-Makweta

WAZIRI wa zamani wa serikali ya awamu ya kwanza Jackson Makweta, ambaye ameangushwa kwenye kura za maoni za CCM, amevunja ukimya akisema utaratibu uliotumika kupata wagombea wa CCM ulikithiri kwa rushwa.

Makweta, ambaye amekuwa mbunge wa Jimbo la Njombe Kaskazini mkoani Iringa tangu mwaka 1995, pia alisema wengi wa wanachama wa CCM waliopiga kura hawakuwa na uelewa wa kutosha kujua umuhimu wa kura na kwamba wingi huo ulisababisha Taasisi ya Kuzuia na Kupambana na Rushwa (Takukuru) kushindwa kufanya kazi ipasavyo.

Makweta, ambaye aliwahi kuwa Waziri wa Elimu na Utamaduni, alisema hayo juzi katika kipindi maalumu cha mjadala kuhusu mchakato wa kura za maoni ndani ya CCM kilichorushwa na Idhaa ya Kiswahili ya Shirika la Utangazaji la Uingereza (BBC).

Mjadala huo ulimjumuhisha Profesa Paramagamba Kabudi, John Lusinde, ambaye ni mgombea ubunge wa jimbo la Mtera kwa tiketi ya CCM, na naibu katibu mkuu wa chama tawala nchini Uganda(NRM), Maiki Mukula.

Kaatika kura za maoni za CCM zilizopigwa Agosti mosi, wagombea wengi walilalamikia vitendo vya rushwa, ukiukwaji wa taratibu na baadhi ya wagombea kunaswa na Takukuru wakitoa rushwa au kugawa kadi bandia za chama hicho kikongwe. “Utaratibu wa upigaji kura za maoni za chama ni mzuri lakini umeshindwa kufikia malengo ikiwamo kupunguza vitendo vya rushwa," alisema mwanasiasa huyo mkongwe. “Pia, utaratibu huo uliwaruhusu wanachama wengi ambao hawana uelewa wa kutosha kujua umuhimu wa kura, wingi huo ulisababisha Takukuru kushindwa kufanya kazi ipasavyo,'' alisema Makweta. Makweta ambaye aliagushwa na Deo Sanga, maarufu kama Jah People katika kura za maoni, alifafanua kwamba wajumbe waliotumika kuchagua wagombea CCM, miaka ya nyuma, walikuwa na uelewa wa kutosha kuhusu umuhimu wa kura. Hata hivyo, Lusinde ambaye amemuangusha waziri mkuu wa zamani, John Malecela, alisifia utaratibu huo, akisema umezingatia demokrasia pamoja na mahitaji ya wananchi. “Pia umeondoa mazingira ya kupanga wagombea kulingana na maslahi ya watu wachache,'' alisema Lusinde. Lusinde, ambaye pia ni katibu wa CCM wilayani Tarime mkoani Mara, alisema utaratibu huo ulidhibiti kwa kiasi kikubwa wagombea waliokuwa na majina makubwa kutumia nafasi zao kuwakandamiza wengine. “Hata mzee Malecela alishindwa kutumia uwezo pamoja na nafasi yake kufanya kampeni kwa nguvu, alitumia utaratibu pamoja na kanuni tulizokuwa tumejiwekea na ndiyo nikaweza kushinda,'' alisema Lusinde. Naye Profesa Kabudi alisema pamoja na kasoro zilizojitokeza katika kura za maoni, utaratibu huo ni mzuri kwa mustakabali wa baadaye wa taifa. “Pamoja na mambo mengine utaratibu uliotumika si mpya, uliwahi kutumika katika chaguzi za miaka ya 1962, 1964 na hata 1968. Kwa mustakabali mzuri wa kupata viongozi wa taifa, vyama vingine vya siasa vinapaswa kuuiga,'' alisema Profesa Kabudi. Naye Mukula alisema: “Utaratibu huu utatusaidia kukuza demokrasia katika nchi za Afrika kwa kupata viongozi bora na utaondoa dhana mbaya. Ni muhimu ukatumiwa na nchi zote.''

Make Comments About this Article click here