You are here > News > Tuesday News

Last Updated:7.9.2010

ENGLISH | SWAHILI | SPORTS

Lipumba amvaa Hawa Ghasia jimboni kwake

SIKU chache baada ya kuishambulia serikali mbele ya mkuu wa wilaya ya Lindi, Magalula Said Magalula, mgombea urais kwa tiketi ya CUF, Profesa Ibrahim Lipumba jana aliwataka wananchi wamuondoe Waziri wa Nchi, Ofisi ya Rais-Utumishi, Hawa Ghasia akidai yeye na chama chake cha CCM wameshindwa kuondoa umasikini.

Prof Lipumba, ambaye mtaalamu wa uchumi, pia alisema CUF wakipewa dhamana ya kuendesha nchi watafuta utaratibu huo wa stakabadhi ghalani unaolalamikiwa na wakulima wa maeneo mengi ili kuwaondolea wananchi kero na kuwapunguzia umasikini.

Akihutubia katika vijiji vya Libobe, Mkunwa na Dihimba, Prof Lipumba alisema ameshtushwa na umasikini unaowakabili wananchi wa jimbo hilo licha ya kuwa na mbunge ambaye ni waziri na akaeleza kuwa hali hiyo inasababishwa na utawala mbovu wa CCM.

Awali wananchi hao walimweleza Lipumba usumbufu wanaoupata hasa katika uuzaji wa korosho wakiutaja utaratibu wa stakabadhi ghalani kuwa ni mbovu. Chini ya utaratibu huo, wakulima huuza mazao yao kwa serikali ambayo hununua kumlipa mkulima fedha za kujikumu wakati wakisubiri mazao yao yauzwe ndio wamaliziwe malipo yao. Lakini muda wa malipo unapofika usumbufu huwa mkubwa.

Wananchi pia walilalamikia uhaba wa maji wakisema kuwa jimbo hilo hutegemea visima vya kuchimbwa ambavyo wakati mwingine hukaukiwa maji.

“Hapa tuna uhaba mkubwa wa maji kwa kuwa huu ni msimu wa kiangazi; visima vyenyewe vinakauka... kuhusu uuzaji wa korosho tunazungushwa mno kupata fedha zetu kutokana na uataratibu wa stakabadhi ghalani,” alisema msoma risala katika kijiji cha Libobe.

Wananchi hao walimponda Waziri Ghasia wakisema kuwa tangu ameingia madarakani ameshindwa kutatua kero zao na wala haonekani eneo hilo.
“Hadi sasa Ghasia hajaanza kampeni huku vijijini. Aliwahi kupita hapa siku moja tu. Kwa kiasi kikubwa hajatekeleza ahadi alizotuahidi,” alisema Yasin Abdallah wa Kijiji cha Mkunwa.

Akijibu risala hiyo, Profesa Lipumba alisema kama watamchagua atafuta utaratibu wa stakabadhi ghalani.
“Haiwezekani mkulima auze korosho zake kwa utaratibu ambao kama kilo moja inauzwa kwa Sh3,000, anapewa Sh 2,000 tu, hizo nyingine anaambiwa kuwa Mungu akipenda atalipwa. Mkinichagua nitaufuta utaratibu huu,” alisema.

Katika jimbo hilo CUF wamemsimamisha Chikamba Wananimuka ambaye atapambana na Hawa Ghasia wa CCM.
Mkazi mmoja wa kijiji hicho, Suleiman Said alisema kuwa wataalamu wa mimea walienda kijijini hapo kuchukua vipimo ili kujua tatizo la minazi inayoshambuliwa na magonjwa, lakini hawajarudi tena.
“Wataalamu walikuja kuichunguza miezi kadhaa iliyopita, lakini hawajariudi tena. Minazi inaendelea kufa kama unavyoona,” alisema.

Kwa mujibu wa Profesa Lipumba, ugonjwa huo usipodhibitiwa unaweza kuangamiza kabisa zao la minazi.
“Ugonjwa huu uliwahi kutokea Zanzibar wakawahi kuudhibiti, lakini naona hapa hakuna jitihada zozote. Usipodhibitiwa utamaliza minazi yote,” alisema.

Lipumba aliendelea kusisitiza sera za chama chake kuhusu elimu ya bure, afya bure na kupambana na ufisadi pindi atakapoingia madarakani.
Mgombea huyo anaendelea na ziara za kampeni katika mikoa ya Kusini Mashariki inayoonekana kuwa na wafuasi wengi wa CUF.

 

Tanzania kuipiku Marekani kwa Uranium

MRADI wa kuchimba madini ya uranium Mkoa wa Ruvuma utakuwa na uwezo wa kuzalisha tani 1,650 kwa mwaka na hivyo kuifanya Tanzania kuwa kinara wa madini hayo duniani, ilifahamika.

Hatua hiyo hiyo itasababisha kuicha nyuma nchi ya Marekani ambayo kwa sasa inavuna tani 1,560 za madini hayo kwa mwaka na kuwa nchi ya kwanza duniani kwa kazi hiyo.

Mkurugenzi Mtendaji wa mradi huo wa Kampuni ya Mantra Resources Ltd Tony Devlin alisema hayo mwishoni mwa wiki mbele ya Mkuu wa Mkoa wa Ruvuma Dk Christine Ishengoma alipozungumza na waandishi wa habari waliotembelea mradi huo. Delvin alimhakikishia Mkuu wa mkoa kwamba mradi huo ni mkubwa na kwamba kinachohitajika ni ushirikiano baina ya wananchi, kampuni na serikali kwa ujumla ili kufanikisha mradi huo. Akizungumza machache, Mkuu wa mkoa alisema mradi wa madini ya uranium katika Mto Mkuju wilayani Namtumbo, ni hazina na kichocheo kikubwa cha ukuaji wa uchumi wa Tanzania. Ishengoma alisema mradi huo, utakuwa chachu kubwa katika maendeleo ya wilaya hiyo, mkoa na taifa kwa jumla, kwa sababu utavutia shughuli nyingi za kiuchumi. "Huu ni mradi wa kujivunia kitaifa kwa sababu utakuwa na manufaa mengi katika jamiii ya watu wa Ruvuma na Tanzania kwa jumla maana utavutia shughuli nyingi za kijamii na kiuchumi," alisema. Mkuu huyo wa mkoa alisema pamoja na mambo mengine, mradi huo utazalisha mamia ya ajira kwa vijana na hiyo kupunguza tatizo la ajira miongoni mwa wananchi. "Tumeambiwa na Meneja wa mradi kuwa mahitaji yao mengi kama chakula watanunua kutoka ndani ya nchi hivyo wafanyabiashara na wakulima kwa jumla watakuwa na nafasi nzuri ya kufanya biashara na mradi huo," alisema Ishengoma Aliwataka wakazi wa Namtumbo na Mkoa wa Ruvuma kwa jumla, kuchangamkia fursa hiyo adhimu inayotafutwa na watu wa maeneo mengine nchini. "Lakini pamoja na nafasi hii naomba niwape tahadhari kuwa msidhani kila mtakachozalisha kitanunuliwa, hapana , kinachotakiwa ni kuzalisha vitu vyenye ubora unaoendana na hadhi ya mradi husika," alisema. Alisema uongozi wa mkoa kwa upande wake, utatoa ushirikiano wa kutosha kwa mradi huo na kuwataka wananchi kujenga mahusiano mazuri na wawekezaji. Sisi kama viongozi wa mkoa, tumevutiwa sana na mipango ya mradi hivyo na kwa hiyo tunaiomba serikali kuu kwa upande wake ,iwape ushirikiano wawekezaji hawa," alisema Ishengoma.

Make Comments About this Article click here